من يوميات المخيم
: الصبح بالحسينية
من ذكريات المخيم :
هي الفقرة كانت عجبتكم بالفترة الماضية وانشالله رح نرجع نحكي عن ذكرى من مخيمنا كل يوم .
اليوم رح نحكي عن الصبح بمخيمنا بالأيام العادية .
الصبح بالحسينية .. اكيد الصبح ما بيكون فيه شي مميز ازا كان بغير مكان بس بالحسينية دايما في شي بميز كل شي فيه
بتكون نايم قبل بيوم من الساعة 9 مشان تفيق مصحصح عالامتحان تبعك بمدرسة الوكالة والحمدلله ما بتقدر تفيق بشكل طبيعي .. بيرن المنبه مرة ومرتين وعشرة وانت نايم ولا على بالك لحتى يجي الوالد او الوالدة .. لك بعدك نايم .. رح يروح عليك الامتحان .
بتفز على أربعتك وبتنسى تغسل وجهك وبتروح متاخر عالدوام وانت عم تدك البنطلون وانت ماشي بالشارع
نحنا كبشر طبيعيين بنشوف هالمنظر تقريبا بشكل يومي بالحسينية بس ما بنعرف انو هيك صاير مع هالطالب المعتر ياحرام
بتشوف أشخاص فضائيين بالشراع كل يوم الصبح هاد يلي مو مغسل وجهو وبعدها ريالتو معلمة على كل وجهو ومانو عم يسبح بالريالة طول الليل
والتاني بتلاقيه متل القنفذ وعم يحاول انو يرجع شعراتو لورا وما عم يمشي الحال لان ضاربهم بعشرة كيلو جيل باليوم يلي قبلو ونايم وبدون ما يغسل شعراتو
بس بالمقابل بتشوف هاد الشب الحليوة يلي واقف على زاوية الحارة ولابس تياب المدرسة بآخر شياكة وحاطط واكس وضارب حاجبو اليمين وحامل هالكتب بإيدو وقاعد يستنى ولا على بالو وكانو ما في عندو مدرسة .. بيكون ناطر الصبية لتمرق مشان يشوفها .
الصبح بالحسينية بتلاقي 3 أخوة فايتين عالبقالية وكل واحد معو عشر ليرات واللاد صف تاني او تالت وبيشترو كل واحد شغلة بتختلف عن التاني مشان يتقاسموهم وكل واحد يطلعلو 3 شغلات .. وصاحب المحل بينعل قلبو وهو عم يحكي معاهم
الصبح بالحسينية بتفيق انت بيوم الجمعة او يوم بتكون عطلتك فيه بتكون مبسوط انو رح تنام لل9 او عشرة او لبعد الضهر لأن مبارح انت سهرت منيح لان عرفان حالك رح تنام منيح
بس للأسف بتفيق الصبح على صوت (يلي عندو خبز يابس للبيع) او زمور بياع المي او حتى بياع الغاز أيام العز .. فتلقائيا انت رح تفيق وانت عم تسب بدون ما تحس ع حالك
في شغلة مهمة بالصبح عنا.. انو انت بيكون دوامك الساعة 7 ونص وكل يوم بتفيق 7 وربع لان ما عم تقدر تفيق قبل هالوقت .. وبيوم من الايام بيتغير دوامك او بتتغير مدرستك وبيصير يبلش دوامك عالساعة 8 بس كمان في علة انو انت تلقائيا رح تصير ما تقدر تفيق غر لل8 الا ربع .. هي قاعدة .
أحلى شي الصبح هو انو تكون طالع من بيتك ومانك حاسب حساب تشوف حدا بتعرفو ومانك شايفو من فترة منيحة .. يمكن كان رفيقك بالمدرسة الابتدائية وصرلك 3 او 4 سنين ما شفتو .. وفجأة بهاليوم بتشوفو وانت بتكون طالع بكير مشان ما تتاخر عن شغلك او جامعتك
وبياخدكم الحديث .. بيصير على غير العادة تجي سرافيس فاضية وتزمرلك مشان تطلع بس انت ما بتطلع لانك مبسوط بالحديث
بتروح بتاكل فول من على العرباية يلي قدام المدرسة انت ورفيقك .. وبعد شوي بتلاحظ انو انت تاخرت ما لا يقل عن ساعة عن دوامك
فبتقرر انت ورفيقك انو خلص خيا تعا نروح نطرقلنا فطور مرتب وبلا هالدوام اليوم ..وبيخلص النهار وانتو قاعدين على شاي وقهوة وفطور وغدا .
أيام.
: بداية الشتوية
يمكن أكتر شي بتذكرو بأيلول وبتشرين هو بداية الشتوية مع بداية المدارس
كان الكل يحس ببهجة الممدرسة مع بهجة الشتوية حتى يلي خلص مدارس وحتى يلي ماعندو ولاد بالمدارس .. كان نشاط الطلاب وهن طالعين الصبح بأول أيام المدرسة يعطي الناس نشاط للفيقة بكير .
بتلاقي في ناس صارت تطلع أبكر عشغلها مشان تتفائل بضحكات الولاد الصبح .
شي عشر ولاد بالمكتبة عم يستنو رفيقهم يلي عم يشتري دفتر .. وبتلاقي بالدكان يلي ماكان يفتح قبل ال9 وصار يفتح بكير مشان الطلاب . بتلاقي ولدين اخوة كل واحد مصروفو خمس ليرات بس بيتفقو كل واحد يشتري شغلة غير التانية مشان يقسموهم بالنص .
كنا نطلع نوقف عند موقف السرفيس نستنى شي سرفيس فاضي ... لما كنا طلاب ببيلا او بالست .. سبحان الله طول عمرنا بندفش وبنطحش عالسرفيس .. بس لما يتعلق الموضوع بالمدرسة كنا نستنى يجي سرفيس فاضي يوقف قدامنا .. وهاد طبعا شي مستحيل ... المهم بعد نص ساعة من الانتظار بنقرر نطلع لفوق لعند المقبرة بنوقف وبنوقفروكمان نفس الشي بنكمل مشي باتجاه المشروع بنوقف عدوار المشروع وبتكون الدنيا عم تنفنف مطر ونحنا مبسوطيت بهالوقفة وناويين بقلبنا انو مابدنا نروح اليوم .. بس ماحدا مسترجي يحكي للتاني ... وبعد كمان انتظار ما بنطلع .. بنرجع نكمل مشي باتجاه مدرسة الوكالة لنوقف عند زاوية المصري أو زاوية المدرسة .. وبنبلش نسمع صوت الطلاب من المدرسة .. شي يلي ماعندهم استاذ وصوتهم معبي الدنيا .. وشي يلي بتلاقيهم عم يردو ورا الآنسة .. وشي يلي ناط عالشباك وعم يصيح للرايح والجاي .
وغالبا كنا ناكل المقلب ويجي سرفيس فاضي يوقف قدامنا عزاوية المدرسة ونطلع .. وطبعا بيجي فاضي ﻷن كل الناس طلعت غير نحنا وكنا نوصل دايما متأخرين .
وأحيانا كنا نلاقيها حجة انو تأخرنا .. نروح نجيب كيلو فول وعلى بيت أقرب واحد فينا .. نفطر ونلعب شدة لتصير الساعة وحدة وبعدين نطلع نوقف عالشارع شوي وبعدين بيخلص دوامنا ..
هيك كانت أحلى أيامنا بالثانوية .. وشوارع الحسينية بتشهد على هاﻷيام يلي بتجنن .
: الأعراس بالحسينية
من أحلى الشغلات يلي كانت تصير بالحسينية هية التعليله
تعريف التعليله : هي عبارة عن مجموعه من رفقات العريس بيجيبو مطرب ومجوز وبيقعدو يدبكو عأساس انو تكون حفله صغيره بس لرفقاتو بس بتلاقي كل الحسينية صارت بالعرس.
بتلاقي واحد ماسك الدبكه عالراس من أول السهرة وبس يجي بجنبو حدا بيعرفو بيحكيلو(اجيت والله جابك لك لمين هاد العرس) وبيرد عليه التاني (شو بعرفني أنا جاي اتسلى . لمين ماكان يكون)
بالفعل بتلاقي كتير ناس مو عارفة عرس مين بس شعب بيحب البسط والمشاركه دايما
ومن أساسيات اعراس الحسينية أغنية (هاجر فوق الرعوش) وأغنية (داني أو الودن .هاد اذا اعتبرناها أغنية) وبعدينن بتفقع مع المطرب على (ماريد الجيزه يايما) وبنص هالمزاج العالي مابعرف شلون لازم يغني (فلسطين عربية )وبيقلبها وطني... ماعلينا .
بيجي دور الشخصيات . وطبعا لازم لازم لازم وبكل عرس نعزم خلود ومهند
مهند بينزل عالدبكه وبيبلش رقع وين ماتجي اجرو تجي لحتى ينجلط يلي بجنبو ويحكيلو اطلع لبره وطبعا لازم يحكيها بأدب لأن إذا عصب مهند رح تخرب الدنيا
أما خلود وهية أهضم وأحلى بنت بالحسينية فما حدا بيحس فيها . بتلاقيها واقفه بنص العرس وعم تهز عاليمين واليسار وبأعلى مزاج والصغار عم يلعبو معها .
(على حب النبي فضولنا الساحة) الجمله الأشهر بتاريخ الأعراس بالحسينية . بس الشهاده ل الله شبابنا بيسمعو الكلمه وبدقيقتين بتلاقي الساحه تضاعفت بالناس
وطبعا بيجي 2 أو 3 سكرانين بيلطشو ع شي بنت او بيتحركشو بشي شب . ومن ليش عم تتزور ل مادخلك .بتعلق وبتطلع السكاكين . وهون بيجو الكبارية بيحكو معهم وبيقولولهم (بعد اذن شواربكو أجلوها ماتخربو الحفله) وطبعا هن ما بأجلوها بس بيسحبو بعض وبيتخانقو بالشارع التاني وبتصير تشوف كل شوي واحد راكض . شي حامل شبرية وشي عصاية وأبصر شو.
وهون أهل العريس بيقولو للمطرب استعجل خلينا نعمل الحنة ونفرطها
وبتجي دور الحنه وهات ايدك حنيها يالعريس وانشالله بالرفاه والبنين .
وتاني يوم بعد كل هالإيمان بيعملو مولد .
... حلم
كل مرة بنحكي شوي عن ذكريات من ايام عشناها بالحسينية .. بس اليوم حبيت انو اعمل شي جديد .. واكتب عن شي ما صار .. وما بنعرف ازا ممكن يصير او لأ
رح نحكي عن مستقبل الحسينية حتى لو كان خيال .
شغلو خيالكم وتابعو القصة .
المستقبل القريب للحسينية رح نكون نحنا معكم فيه بكل تأكيد انشالله
ورح يكون اسعد يوم بحياتي لما بنشر خبر عاجل بيقول :
عااااااااجل وهام : تم الآن فتح طريق الحسينية والسماح للأهالي بالعودة الى منازلهم منذ هذه اللحظة .
والناس تبلش تضب غراضها وتحطها بهوندايات وتطلع عالحسينية .. وتلاقي السيارات عند مدخل الحسينية عاملين فاردة وشغالة الزمامير متل كانو عرس الحسينية وجايين نفرح فيها
ونحنا بنكون عم ننقل صور الناس والهوندايات يلي عم تفوت عالحسينية محملة غراض النازحين يلي رجعو عالحسينية وما عاد يطلعو منها غير ع فلسطين
صورة بتنزل لتنين جيران عم يسلمو عبعض ويحضنو بعض لان صارلهم سنة ما شافو بعض ولا بيعرفو شي عن بعض
وصورة تانية لولاد حارة ما صدقو ايمتى يوصلو ويجو ولاد جيرانهم يلي اشتاقولهم واشتاقو للعب بالحارة معهم
واليوم التاني .. بيبلشو الناس تنضيف الحارات والشوارع وقدام بيوتهم .. وبننزل صور لرجال ونسوان عم يشتغلو وينضفو ويشطفو قدام بيوتهم
وصحاب المحلات بيطلعو بيفتحو محلاتهم ليشوفو ازا بقيان فيها شي .. ويلي بقيان في بمحلو شي بيفتح حتى لو هالشي ما بينباع بس مشان يحس حالو انو رجع ورجعت روحو
وبعد يوم بننزل خبر : استمرار عودة الاهالي الى منازلهم في مخيم الحسينية وحتى الآن عاد الى الحسينية ما يقارب نصف السكان وبدأت الحياة تدب في الحسينية وشوارعها بدات تضج بخطا السكان كما نلفت الانتباه الى ان الكهرباء متوفرة بشكل جزئي ويتم اصلاح باقي الحسينية من قبل شبابها لتصل الكهرباء الى كل بيت في الحسينية
وبهاد الوقت بتكون الناس بعدها مو مستقرة مية بالمية وبعدهم ما تركو بيوتهم يلي مستأجرينها برة لان لسة ما في سيارات ومواصلات للطلاب والعمال يلي بدهم يطلعو من الحسينية ومشان هيك في ناس بعدها ما رجعت
وبيجي اليوم الرابع يلي بننشر فيه .. دخول أول سيارة خضار وفواكه الى الحسينية بعد انقطاع اكثر من عام على عدم دخول اي سيارة خضار الى المخيم
وبتنزل صورة للناس يلي راحت تشتري خضرا وفواكه من السيارة بدل ما كانو ينزلو عالشام او عشي مكان تاني يجيبو خضرا
وبعدها بساعة او ساعتين بيجي خبر عاجل : السماح للسسيارات والسرافيس بدخول الحسينية عبر الحاجز وذلك بعد التفتيش الدقيق على الهويات والسيارات .
وبسرعة بعد اقل من ساعة بينزل خبر عاجل : دخول اول سرفيس الى الحسينية بعد اكثر من عام وفيه ركاب من الحسينية. قادمون من كراج الست عبر طريق المطار .
والاحداث رح تمر بسرعة كتير حتى انو عنجد رح نحس فيها متل كانو عيد .. والصبح رح نبلش نشوف ناس عم تستنى سرفيس لتروح على شغلها او جامعاتها ويلي مستعجل كان يطلع لعند مفرق طريق المطار ليركبو بالسرافيس تبع خربة الورد .
ولهلأ مافي غير سرفيسين او 3 يلي عم يفوتو عالحسينية بس عم بكونو مناح بالنسبة لعدد السكان يلي بعدو ما صار عجقة كتير والناس عم تدبر حالها المهم انو رجعو عبيوتهم
خبر عاجل : الانتهاء من اصلاح آخر خط كهرباء في الحسينية وبذلك يكون كل منزل في الحسينية قد وصلت اليه الكهرباء .. مع التنويه الى عدم استهلاك الكهرباء بشكل مسرف لكي لا تتسبب بانقطاعات متكررة وتعطيل في الخزانات لانها ليست معدة لتحمل كل هذا العدد من المنازل .
طبعا الناس يلي نازل ببيتها قذيفة او واقع شي حيط كمان بلشو يرجعو ... بعد اقل من اسبوع وصارو يسكرو الفتحات الصغيرة بالحيطان او السقف بشغلات بدائية متل نايو او خشب لبين ما يسمحو لمعامل البلوك والنجارين بالشغل بالحسينية وكمان لبين ما الله يفرجها ويصير معهم مصاري ويصلحوها .
ووصل عدد السكان فوق 65% وصارت الحسينية فيها حركة كتير حلوة وشبه طبيعية .
وبينزل خبر جديد ... مبادرة .. مبادرة عبر صفحتنا للمعلمين والطلاب الجامعيين وكل من يريد التطوع لتنضيف عدد من الصفوف في مدرسة الوكالة واخراج بقايا الدمار منها وافتتاح صفوف للطلاب من الصف الخامس وحتى التاسع بشكل مؤقت ... وهو بتبلش الشباب بالشغل ,, وبيبلشو الطلاب الجامعيين والاساتذة بالتطوع وبعد نهارين بننشر خبر : بعد نجاح المبادرة التي ساهم فيها شباب الحسينية الكرام غدا سوف يكون اول يوم دراسي في مدرسة الوكالة للطلاب من الصف الخامس وحتى التاسع .. فعلى جميع الاهالي ارسال اولادهم غدا في السابعة والنصف صباحا .
وطبعا التغطية مستمرة وعم ننزل صور الطلاب بالمدارس وكيف بلشت المدرسة تبعهم بدون ما يكون في مدرسة ولا قرار من التربية ولا اي شي .
وبنفس النهار بينزل خبر عاجل : دخول سيارة طحين الى الحسينية محملة ب2 طن من طحين القمح ولا نعلم وجهتها حتى الآن .
وبعد ساعتين .. عاجل : تشغيل فرن ابو سعيد في الحسينية والفرن القديم سوف يتم تشغيله اعتبارا من بداية الاسبوع القادم .. اما فرن المشروع الجديد فقد علمنا مؤخرا انه تحت الصيانة وسوف يتم افتتاحه عند الانتهاء منه .
وهون بتبلش الحياة ترجع طبيعية اكتر واكتر وبيرجع ناس اكتر وبتقرب نهاية الشهر وماحدا بيرضى يجدد الاجار لان راجع عالحسينية .. وصحاب المحلات والبقاليات بيفوتو بضاعة وبيفتحو محلاتهم ببضاعة خفيفة ومافيها غير الشغلات الضرورية .
وبيفتحو معامل البلوك وبتبلش الورشات تشتغل بالحسينية ويعملو تصليحات عالخفيف لبيوتهم ..
وصار عدد السرافيس يلي بتفوت عالحسينية فوق العشرة ورجعو يوقفوا عالدور قدام الجامع متل زمان .. وبتفتح مكتبة ابو نبيل الله يرحمو ومكتبة الهدى ومكتبة العابد حتى لو عالخفيف كمان .
وبيفتح اللحام والعصرونية والحداد والنجار ومحل المنظفات ومحلات الموبايلات والكمبيوترات وبتفتح الكفي نت
وبتبلش الحياة ترجع بشكل طبيعي اكتر واكتر .
وبيجي خبر عاجل بعد شهر : قرار من المحافظة بإصلاح خطوط الهاتف الارضي الواصلة الى الحسينية.
وباقل من اسبوع بترجع الهواتف .. وبيرجعو الناس يمدو خطوطهم يلي قطعتها الحرب . وبترجع خطوط الانترنت كمان .
هون بيكون رجع اكتر من 90 بالمية من السكان .. والعشرة الاخيرة هم يلي ما رح يرجعوا هلا ويمكن ما يرجعو ابدا ...
خبر عاجل : استلام بلديات الحسينية الثلاثة لمهامها وبدء عمليات الصيانة للمدارس والمساجد .
وبمساعدة الاهالي بينتهي تصليح كل الجوامع واكتر من مدرسة بفترة كتير قصيرة .. وبتفتح مدرسة الوكالة بشكل رسمي وبيطلع قرار من رئاسة الاونروا ببدء دوام الاساتذرة الفعليين وبيرجع الطلاب كلهم يداومو من الاول للتاسع
وبيطلع قرار من التربية بافتتاح كل مدارس الحسينية واستقبال الطلاب .. وبتفتح المدارس وبيرجعو كل الطلاب يلي ما داومو يداومو .
وكمان خبر هام : مباراة ودية سوف تقام غدا في تمام الواحدة ظهرا في نادي تل الفخار بين فريقي .... و .... على شرف عودة الاهالي الى مخيمهم .. وهي اول مباراة تقام في النادي منذ اكثر من عام ونصف العام .
وبيرجع المطر والطين .. وبترجع الزيعة عالاساطيح وقدام البيوت تطلع .. وبنرجع نلعب طابة بالحارة مع ولاد الجيران حتى لو كبرنا كتيييييييير وحتى لو كبرنا شي خمسين سنة ونحنا ما تجاوزنا العشرين او التلاتين سنة .
وبترجع السهرات .. وقطعة الكهربا والشدة والاركيلة والشاي والرفقات والبزر والقعدة بالشمسات الصبح .
كل شي رح يرجع .. الا الشهيد .. والايام يلي راحت .
رح تتغير كتير شغلات علينا .. رح نبطل نحكي بالسهرات عن بطولاتنا ايام زمان . رح نصير نحكي بالسهرة كيف كنا عايشين ونحنا برات الحسينية .. رح نحكي الموت والخوف والدم وكل شي شفناه بهالسنة او اكتر شوي .
بس رح نكون مبسوطين انو عم نحكي عن هالذكريات .. ونحنا قاعدين ببيوتنا .
ان شاء الله ...
: الزلازل
أكيد في كتير ناس استغربت من العنوان . بس كمان في ناس رح تعرف عن شو عم نحكي وتتذكر الزلازل
الإشاعات بمجتمعنا قصة قديمه مو شي جديد أو يمكن مو إشاعات كانت أخبار غلط
من حوالي 14 سنة او اكتر شوي كان والدي عم يفيقني الساعه 6 الصبح .بالأول استغربت مافي بالعاده ابوي يفيقني بس لما شفتو مستعجل وعم يفيق كل اخواتي عرفت انو في شي
كان عمري حوالي 10 سنين
صار ابوي يستعجلنا ويقوللنا يلا استعجلو البسو شي دافي خلينا ننزل باقي نص ساعه وببلش الزلزال
اف . لك زلزال شو... كان مشغل الراديو حكالنا هس اسمعو
وبالفعل المذيعه كانت عم تنبه لضروره اخلاء الأبنية والتوجه لأماكن فاضية
بالفعل نزلنا متل كل هالناس وكنا ساكنين بالمشروع وكان بدل المشروع الجديد ورا مدارس شحاده حسين كلها بساتين
لقينا هالبساتين مليانة ناس الساعه 6 ونص وكل عيله آخدين معهم أكل وبدون مي وقاعدين ع بطانية ومعهم راديو صغير
وكانت هالكارثه أشبه باحتفال . الناس تتعرف ع بعضها والولاد عم يلعبو . بتذكرها كأنو مبارح
المهم ضلو الكبار عأعصابهم بينما الصغار مبسوطين
وفجأه طلعت المذيعه عالراديو عند الساعه 8 وكل الكبار صارو يسكتونا مشان يسمعو
وهون قالت المذيعه انو الزلزال أخطأ التوقعات وكانت عباره عن هزه أرضية بسيطه مرت بدمشق وبجوز ماحدا شعر فيها وبإمكان الناس ترجع عبيوتها
وهون كل واحد أخد عيلتو وغراضو وراح عالبيت وكانو الصغار زعلانين لأن خلصت الرحله
يلي عمرو فوق ال 24 سنة وكان ساكن بالمشروع أكيد رح يتذكر هالقصه منيح.
وفي قصة زلزال تاني بنحكيها بمره تانية.
: نشأة صفحة أخبار مخيم الحسينية
نشأة صفحتنا وكيف كانت ومين نحنا ...
بيوم من الايام كان في حلم بالحسينية اسمو الهاتف الارضي .. ولما بدأ يصير هالحلم حقيقة ويصير في باغلب البيوت في هواتف صار تلقائيا ينشـ عند الناس وخاصة فئة الشباب حلم جديد يلي هو خط انترنت ADSL بكل بيت .. وبالفعل هاد يلي صار .. بلشت الناس تسجل على بوابات انترنت وصار في كتير بيوت بالحسينية من سنة ونص او سنتين عندهم انترنت بالبيت .
كان بهاد الوقت قايمة قيامة المخيمات بدرعا وحمص واللاذقية وغيرها .. وكنا نتابع صفحات الفيس بوك تبع المخيمات لنشوف شو اخبارهم .
ولما تطورت الاوضاع شوي وبلشت الاسعار تزيد والمواد تقل بالسوق قررنا انو بدنا نعمل صفحة عن الحسينية وماكان هدفنا غير انو يكون النا صفحة متل باقي المخيمات .
بس للاسف كان في صفحتين بيحكو عن الحسينية .. والصفحتين بنفس الاسم (مخيم الحسينية نيوز) والصفحتين ماكان ينزل فيهم شي ابدا ولهلا في صفحة بعدها واقفة من سنتين وفي صفحة تطورت وصارت كبيرة منهم ... نحنا قلنا بدنا نخلي الناس تعرف الحسينية اكتر مشان هيك رح نساوي صفحة جديدة ومشان التمييز وعدم التقليد قررنا نسميها كلها بالعربي وسميناها ( اخبار مخيم الحسينية )
طبعا الاسئلة كيف ومين انتو ..
نحنا عبارة عن 4 شباب من الحسينية ... هيك كنا طبعا بس بعدين تغير كل شي .. الشباب هم .. نور وبنزيما بعدهم لهلأ بالصفحة .. وكان في معنا احمد من اهالي الحسينية وانتقل لليرموك ... وكان في معنا شب اسمو ميلاد ومن شي 3 او 4 شهور اخدوه على احد الحواجز بسبب الاشتباه بالاسم ولهلا بعدو (الله يطالعو بالسلامة) .
نور اطلق الصفحة ... وكانت عبارة عن صفحة ثقافية .. ما الها علاقة لا بالمجتمع ولا بالسياسة ... كنا ننشر اقوال وقصائد لكبار الشعراء الفلسطينيين والكتاب العرب مع بعض الصور .. وكنا نحكي عن الذاكرة الفلسطينية واخبار غزة وفلسطين بدون اي شي عن الحسينية لان ماكان في شي ينحكى .
بلشت الانتقادات كتير تجينا انو ليش اسمها الحسينية ازا ما فيها شي عن الحسينية .. ومن اكتر الناس يلي انتقدتنا اشخاص من بيت ديب وناس من بيت حسين وناس من بيت قبلاوي .
وبالفعل صرنا نحنا ال4 ندور على اي شي بيتعلق بالحسينية لننشرو وكان في صعوبة كتير انو نلاقي شي ... بس فجأة صارت تتغير القصص .. صار عندنا معارف كتير يلي هم المراسلين وصارو يخبرونا بكل صغيرة وكبيرة ... صار في مواعيد للتسجيل عالغاز والمازوت .. صار في نشر عن التوزيع بالمؤسسة وشو عندهم وشو البطاقات يلي عم ياخدوها .. صرنا ننشر احيانا الاسعار والمخانقات والمشاكل يلي بتصير وحتى صرنا نصور الحسينية بدون اي سبب بس لنصور الحسينية .
تطورت الاوضاع اكتر .. صار في قذائف تنزل وصار في احراق دواليب بالحسينية بلليل وصار في كل يوم مظاهرات بالذيابية وبعدين فات الجيش الحر عالحسينية وووووو ....
كنا ننشر اسماء الجرحى والشهداء واماكن نزول القذائف والوضع بالحسينية والناس يلي عم تطلع وايمتى فات الجيش ووين وصل وشو صار بكل التفاصيل .
وهلأ صرلنا تقريبا سنة او اقل شوي برات بيوتنا .. وطبعا نحنا مدراء الصفحة متلكم كمان نحنا واهالينا شي بببيروت وشي جرمانا وشي بدنون وشي بالكسوة وخان الشيح وقدسيا وووو
وهلأ عم نحاول نعمل حملة الكترونية نحاول من خلالها انو نوحد صوتنا ونوصلو للجهات المعنية لحتى يعرفو قديش عم نعاني بالتهجير والنزوح وانو بدنا نرجع عبيوتنا حتى لو بدون كهربا
وبس ...
بيوم من الايام كان في حلم بالحسينية اسمو الهاتف الارضي .. ولما بدأ يصير هالحلم حقيقة ويصير في باغلب البيوت في هواتف صار تلقائيا ينشـ عند الناس وخاصة فئة الشباب حلم جديد يلي هو خط انترنت ADSL بكل بيت .. وبالفعل هاد يلي صار .. بلشت الناس تسجل على بوابات انترنت وصار في كتير بيوت بالحسينية من سنة ونص او سنتين عندهم انترنت بالبيت .
كان بهاد الوقت قايمة قيامة المخيمات بدرعا وحمص واللاذقية وغيرها .. وكنا نتابع صفحات الفيس بوك تبع المخيمات لنشوف شو اخبارهم .
ولما تطورت الاوضاع شوي وبلشت الاسعار تزيد والمواد تقل بالسوق قررنا انو بدنا نعمل صفحة عن الحسينية وماكان هدفنا غير انو يكون النا صفحة متل باقي المخيمات .
بس للاسف كان في صفحتين بيحكو عن الحسينية .. والصفحتين بنفس الاسم (مخيم الحسينية نيوز) والصفحتين ماكان ينزل فيهم شي ابدا ولهلا في صفحة بعدها واقفة من سنتين وفي صفحة تطورت وصارت كبيرة منهم ... نحنا قلنا بدنا نخلي الناس تعرف الحسينية اكتر مشان هيك رح نساوي صفحة جديدة ومشان التمييز وعدم التقليد قررنا نسميها كلها بالعربي وسميناها ( اخبار مخيم الحسينية )
طبعا الاسئلة كيف ومين انتو ..
نحنا عبارة عن 4 شباب من الحسينية ... هيك كنا طبعا بس بعدين تغير كل شي .. الشباب هم .. نور وبنزيما بعدهم لهلأ بالصفحة .. وكان في معنا احمد من اهالي الحسينية وانتقل لليرموك ... وكان في معنا شب اسمو ميلاد ومن شي 3 او 4 شهور اخدوه على احد الحواجز بسبب الاشتباه بالاسم ولهلا بعدو (الله يطالعو بالسلامة) .
نور اطلق الصفحة ... وكانت عبارة عن صفحة ثقافية .. ما الها علاقة لا بالمجتمع ولا بالسياسة ... كنا ننشر اقوال وقصائد لكبار الشعراء الفلسطينيين والكتاب العرب مع بعض الصور .. وكنا نحكي عن الذاكرة الفلسطينية واخبار غزة وفلسطين بدون اي شي عن الحسينية لان ماكان في شي ينحكى .
بلشت الانتقادات كتير تجينا انو ليش اسمها الحسينية ازا ما فيها شي عن الحسينية .. ومن اكتر الناس يلي انتقدتنا اشخاص من بيت ديب وناس من بيت حسين وناس من بيت قبلاوي .
وبالفعل صرنا نحنا ال4 ندور على اي شي بيتعلق بالحسينية لننشرو وكان في صعوبة كتير انو نلاقي شي ... بس فجأة صارت تتغير القصص .. صار عندنا معارف كتير يلي هم المراسلين وصارو يخبرونا بكل صغيرة وكبيرة ... صار في مواعيد للتسجيل عالغاز والمازوت .. صار في نشر عن التوزيع بالمؤسسة وشو عندهم وشو البطاقات يلي عم ياخدوها .. صرنا ننشر احيانا الاسعار والمخانقات والمشاكل يلي بتصير وحتى صرنا نصور الحسينية بدون اي سبب بس لنصور الحسينية .
تطورت الاوضاع اكتر .. صار في قذائف تنزل وصار في احراق دواليب بالحسينية بلليل وصار في كل يوم مظاهرات بالذيابية وبعدين فات الجيش الحر عالحسينية وووووو ....
كنا ننشر اسماء الجرحى والشهداء واماكن نزول القذائف والوضع بالحسينية والناس يلي عم تطلع وايمتى فات الجيش ووين وصل وشو صار بكل التفاصيل .
وهلأ صرلنا تقريبا سنة او اقل شوي برات بيوتنا .. وطبعا نحنا مدراء الصفحة متلكم كمان نحنا واهالينا شي بببيروت وشي جرمانا وشي بدنون وشي بالكسوة وخان الشيح وقدسيا وووو
وهلأ عم نحاول نعمل حملة الكترونية نحاول من خلالها انو نوحد صوتنا ونوصلو للجهات المعنية لحتى يعرفو قديش عم نعاني بالتهجير والنزوح وانو بدنا نرجع عبيوتنا حتى لو بدون كهربا
وبس ...
: الشتوية بالحسينية
اليوم رح نحكي عن شتوية الحسينية ..
الشتوية بالحسينية الها معنى خاص جدا جدا جدا
بين السبسبة والتكفير على (اول واحد سكن بالحسينية) من ورا الطين والوحل .. وبين الاستمتاع بالقعدة بجنب الصوبيا بلليل والكهربا طافية .
كل شي بالحسينية مميز ... حتى الشي البشع صرنا نعشقو .
بتبلش الشتوية بفرحة بتغمر الكبير قبل الصغير .. ودايما اول شتوة بتكون بايلول يعني مع بدايات المدارس .. وبتكون فرحة الولاد ما بتتعوض .. لما بتشتي وهن بالفرصة او بالحلة من المدرسة
بتلاقي الناس فورا فتحت بواب بيوتها والشبابيك ووقفت تشوف المطر .. وكأنو المطر مابنشوفو غير بالعمر مرة وحدة .
بعدين الناس بتتعود شوي عالمطر وبيبطل شي غريب .. بيبلش الطين والوحل .. والمعاناة مع شوفيرية السرافيس الصبح بعز البرد والمطر .. هاد يلي بيقلك بس على ببيلا .. وهاد بس عالست .. وهاد يلي ما بيطالع غير بنات مدارس .. وكأنو الشباب مو طلاب مدارس ورح يتاخروا .
المهم الواحد مننا ما بيلحق يطلع بالسرفيس وهو عم بيسبسب عالوحل والمطر لحتى يسب هلأ عالكرسي يلي متل قطعة الجليد .. ما بيلحق يقعد وبتطلع هديك الشهقة من البرد
اما الشتوية بلبيت فموضوع تاني كليا .. الشتوية بلبيت احلى شي بالحسينية .
بتجي من شغلك او دراستك بتقعد بدك تتغدى ... لك لييييييييييش مو مشغلين الصوبية (بيصيح على يلي بلبيت ) واكيد الجواب جاهز .. يعني مافي حدا بلبيت حرام نصرف مازوت .
وبتغيب الشمس والصوبيا بتكون شغالة .. والجمعة حوالين الصوبيا ... وعلى فكرة القعدة تحت بوري الصوبيا بيصير عليها سباق ويلي بيقعد تحت البوري ماعاد بيقوم لحتى يا اما ينام تحت الصوبيا او لحتى ما يقدر يتحمل حالو اكتر
هلأ للصوبيا في كتير شغلات غير انو بتدفي .. من هالشغلات انو بتصير مايكرويف لتسخين الاكل .. وبتصير كمان منشر غسيل بس مو حيلا غسيل .. ما بتلاقي غير كلاسين الولاد الصغار .. والجرابات عليها .
ومرتين تلاتة بهالسنة بنجيب هالكستنا وبنحطهم على هالصوبيا وبتصير تطقطق .. اااااااخ ياكسستنا
ولا تحماية الخبز على الصوبيا .. حكاية لحالها .. كاسة شاي وخبزة مقحمشة قدام التلفزيون بتغنينا عن قصور الدنيا كلها واطيب من الف فروج مشوي .
هاد الحكي كلو .. لما يكون في مازوت .. وكهربا ..
بس الاحلى من هاد لما يكون مافي مازوت بلبيت .. وتكون الكهربا مقطوعة ,.. وخاصة ازا كان في ناس عم يدرسو بلبيت .
كل واحد بياخد هالحرام تبعو وبيتغطى فيه .. وخاصة البنات .. بتلاقيهم عاملين متل ام اربع واربعين بس اربع واربعين راس مو اجر ,, يعني بتشوف جسم واحد بس طالع من فوق 5 او 4 روس
الدنيا برة عم ترعد وتبرق ومقطوعة الكهربا وعندنا بكرة مذاكرات .. هون بنعرف قيمة الشمعة او ضو الكاز .. ويلي ما بيلحق يخلص بيعتبر حالو انو ضاع مستقبلو وخاصة ولاد الابتدائي بيصير يبكي ازا في شي مو حافظو مع انو عيونو بزو من الشمعة .
لا واحلى شي بالشتوية انو بتشوفو مخلوقات غريبة بالشوارع .. يعني في عندك التنين على هيئة انسان .. هاد يلي بيطلع من تمو دخان
وفي كمان المهرج بلبرد .. يلي دايما انفو احمر احمر احمر .. وبالبرد الكتير بيصير ازرق او اخضر .. اشارة مرور
وكمان في ناس ادانها هية الحساسات .. بتشوف واحد ابيضاني وادانو حمر وانفو ازرق وعم يطلع دخان من تمو وانفو .. بتفكر حالك صرت بسبيس تون
واحلى شي بآخر الشتوية لما بتطلع الشمس .. بتلاقي الناس ما صدقت تطلع الشمس لحتى يقعدو بالحارة او عالسطح .
وازا ضلت الشمس طالعة اسبوعين ورا بعض خلص معناتها اجت الصيفية عند اهل الحسينية والنسوان بياخدو ولادهم الصغار وبيروحو على اقرب بستان يقعدو يتشمسو فيه .. لحتى يطلع العشب بهالبستان وبيصير البستان منتزه عائلي وخاصة يوم الجمعة والسبت .. حتى لو كان هالمنتزه هو المقبرة
: يوم الجمعة في الحسينية
يوم الجمعة من الطبيعي انو يكون أحلى أيام الأسبوع لأن كلنا بنعطل فيه.
بيتميز يوم الجمعه بالنومه المشبعة يعني بنشبع نوم فيه بعد سهرة طويلة يوم الخميس
ودايما بكل عيله بيكون في حدا نشيط بيفيق بكير وبيبعتوه الأب أو الأم يجيب فطور.وطبعا فطور الجمعة فول وحمص ومسبحه وفلافل وأحيانا تسئية
بيروح هاد النشيط ليجيب الفطور وبلاقي المحل زحمة كتير وبدو شي ساعة ليجي دوره
وبهاد الوقت بيكونو البنات فاقو وبلشو يضبضبو البيت
ومستحيل تمرق ضبضبة البيت بدون خناقه
بيجي النشيط وبحطو الفطور وبيكونو عم يستنو الأب ليطلع من الحمام مشان صلاة الجمعة
بيفطرو وبروحو الشباب عالجامع بيصلو وبيوقفو قدام باب الجامع يستنو رفقاتهم
وبتلاقي البسطات قدام الجامع شي عرانيس وشي بطيخ وشي فريز ... إلخ.
بيجتمعو الشباب وبيوقفو شوي يتفقو عشي قعده او مشوار
وبعدين كل واحد بيروح عبيتو وبيلاقو البيت متل الفل وريحة النضافه معبية الحارة بعد الشطف
الشباب بيمسكو جهاز التلفزيون وبيصيرو يقلبو
وينتظرو الطبخ ليصير وغالبا بتكون الطبخة رز وشوربه
وبعد الغدا بتبلش النشاطات
الشباب بيروحو شي مشوار مع رفقاتن ع شي مسبح او مزرعة او ع طريق المطار
واذا كانت شتوية بيجتمعو عند شي واحد عزابي ويلعبو شده
بينما البنات بيجتمعو عند أقرب وحده وبيستلمو الغايبه من اول القعدة ليروحو
وطبعا من شي 7 سنين كانت العيله تجتمع قبل الغدا عالمسلسل البدوي
وقبل الأزمه كانو يطلعو رحلات ع بصرى أو الجنوب او حتى ع طريق المطار بالأيام المشمسة
وبأيام الشتا الكل بيجتمعو عند هالصوبيا وبيسخنو خبز وكستنا لتخلص القعده وينامو بكير مشان الدوام.